Thursday, December 20, 2007

مطــــــر باللحمة

عمركو شفتو مطر باللحمة؟؟
طيب بدي احكيلكم هالخريفة.. هداك اليوم كنت ماشي بالسوق.. والسوق ملييييييييييان بكل انواع الخضار والفواكه والبني ادمين.. أوقفني صبي أسمر بشعر منكوش بشدة.. قاللي: عموووووو احكيلي قصة..؟ استغربت: يعني بالعادة لمن يوقفك صبي على هالشاكلة بالسوق بيقولك هات شيكل.. او هات تنين شيكل او خود اشتري( ليدن) = (علكة) بس انو يوقفني ولد عشان يطلب مني احكيله قصة في سوق غزي غارق بالبشاعة والرائحة.. فهذا يا اصدقائي ما لا عين شافت ولا دان سمعت
انصدمت.. طلبت منو يكرر السؤال كمان مرة.. يمكن صاير اخرس وما بقدر اشوف منيح.. اتطلع علي بنظرة وقحة وصرخ بوجهي وبدأ يحرك باصبعه قدام وجهي: عم بحكيلك بدي قصة.. شو ما بتعرف ولا قصة..ولا قصة؟؟ أي حكاية بالدنيا.. آه
بصراحة الدنيا كانت وجه عيد ومزاجي مش كتير رايق وانا بصراحة مش صحبة كتير مع الأعياد والمناسبات الوطنية والقومية والدينية والسياسية والفنية.. لفيت براسي يمين.. لفيت براسي شمال.. دورت ع كاميرا خفية او متخبية تحت بسطات البندورة والبطاطا.. للأسف ما شفت ولا عدسة.. تطلعت عالولد مرة تانية: كانت عينيه بتقدح شرر زي ما بيقولي.. وعشان اكون صادق مع حالي ومعاكم خفت ليقوم وهو ومطلع الكلاشن من جيبته وطاخخني.. مسك ايدي زي اللي عنجد.. وتمشى معي فوق الزبالة وقال بصوت عالي : رح ابدأ انا وانت بتكمل.. اتفقنا؟؟ وبدون ما أجاوب بدا يحكي
بيوم من الأيام وبسالف العصر والأوان لحتـــــــــــــى كان.. كان في.. وسكــت
اتطلعت عليه باستغراب.. اشر بايده انو أكمل القصة.. لسه بدي ابلش ما لحقت اكمل الـ(في) تبعته إلا والمطر بينزل زخ من عند الرب.. اه والله يا جماعة.. ولسه ما صحيت من الصدمة إلا واللحم بينزل علينا من السما.. يا الله.. لحمة.. لحم أشكال ألوان كبير وصغير مقطع ومفتت لحم فخاد ولحم صدور ولحم كبدة وييييييييييه.. وكل قطعة بتنزل على راسي زي الحجر.. استغربت كتير.. دورت على الولد ما لقيته.. لقيت في المكان اللي كان واقف فيه خروف بيتطلع بعين وحدة وبيأشر باصبعه إلي وبيقولي: بدك تكمل القصة ولا لأ؟
!..

1 comment:

طــــــــــــــ في ــــــــــــــــــــا said...

صح النوم يا صاحبي

هاي رؤية ... والرؤية ما بتيجي غير للصالحين ... وبالتالي انت ضاوي كتير وهاي علاقة قوية بينك وبين الصالحين على قولت الناس - وجه مشعشع - والتفسير برأئي والله اعلم - انه هاي بشارة العيد
وزي ما ربنا فدا اسماعيل بالخروف (كبش فداء) اختفى الولد واجا مكانو كبش - والنيل من هيك انه الولد والخروف تفكيرهم واحد صار بغض النظر هي موضوع قصة ولا موضوع قتل ولا حياة
كلو ازفت من بعضو

احلام سعيدة المرة الجاي
من كتاب تفسير المستحلمين //طافي