بالعادة لمن بكون صاحي طول الليل إما لاني قاعد ببرم مع صبية او لاني شربت خلال النهار 7 (مجات) قهوة كبيرة واللي رح توديني بداهية بالآخر زي ما بيحكي الوالد.. بهاي الأثناء بحب أكون بـ[عالمي الخاص] اللي مش معني احكيلكم عنه كتير.. بس بقدر اقول انو فيه موسيقا بحبها جداً لفنان اسمه عمر بشير عازف عود بيرافقه جيتار من نوع آخر.. وبالعادة لأني مغرم وولهان بالوتريات وخصوصاً الجيتار.. بأفضل اسمعه قبل النوم.. بهاي الأجواء بأعطي مجال لنفسي إني أفكر في اليوم اللي عشته بزناخته وبقرفه وبحلاوته.. للأسف حتى الحلاوة الطحينية كمان ح تخلص قريباً.. مش مهم الحلقومة موجودة.. برجع وبحكي عن غزة..
تفــــــــــــــــوووووووووووووووووووووووووووووووو
بهاي اللحظات بافكر في المستقبل المشوه.. لوين رايح.. وأي قطار رح اركب عشان اخرج من سجن مدينتي إلى سجن مدينة تانية لا تعترف بي كنصف بشري.. بالعادة بأتذكر مجموعة الصبايا اللي مروا على حياتي.. بغلط عليهم وعلي.. وبقعد أخربش على أوراقي اللي بتملأ المكتب دون أي قدر من النظام مجموعة خربشات تانية.. في الآخر عم اكتشف انو احنا عايشين ضمن خربشة لكاتب- زي ما بيحكي جوسطين غارترد برواية عالم صوفي.. او ضمن خربشة بتدور برأس نملة بليلة عرسها مع نمول (مذكر نملة) أو خربشة كائنات فضائية منقوشة (زعتر) على جدار المجرة الغبية اللي مش عارفة وين رايحة بهالناس ولوين ماخداهم.. يمكن مجمل هاي الخربشات أصلاً هو خربشة براسي الوحيد المتفرد في الكون .. ويمكن كلكم مش موجودين أذا غمضت عيوني.. انتو كلكوا يا جماعة مش أكتر من ممثلين ثانويين.. شو ضمنني انو انتو عايشين زيي.. وانو بتعيشوا حياة خاصة فيكم.. ليش ما يكون هاد دور عم بتمثلوه ولمن يخلص رح تختفوا من الوجود حتى دوركم الجديد..؟؟ يمكن عم أخبص.. اوك.. ومين مش عم بيخبص .. كلنا عم نخبص.. كل واحد يتفرج ع حاله منيح بيشوف انه مش أكتر من (مخبصاتي) متقن لدوره بتمعن.. وبيكذب الكذبة وبيصدقها.. انا مش حابب لا أكون الكذبة ولا الشخص اللي بصدقها.. بحاول افهم ليش الناس كلها بلحظة معينة ما تنزل عالشوارع وتقعد تصرخ
بدنا نخربش احنا كمان.. زهقنا بس نكون المخربش عليهم ولا الضاليين
وتعبر عن رأيها بكل وضوح وشفافية وأريحية يلا نعيش حياتنا بدون ترتيب وبدون تحضير أو تفكير (مهو ع الفاضي سواء فكرنا وخططنا او ما عملنا شي) الخربشات المجهولة بتتحكم فينا وبأقدارنا وبتودينا ع جهنم وشو عرفنا يمكن بعد جهنم نكتشف انها كمان خربشة عم تدور براس طفل صغير قاعد عم بلعب بالرمل على بحر غزة في الشتا
بدي أروح أنام.. أحسن
No comments:
Post a Comment